Kreu i qeverisë, Edi Rama në një konferencë për mediat ka bërë me dije se në planin e masave të reja për kontrollin e territorit, parashihet që nëse një punonjës shteti do të konstatohet se ka kryer ndërtime pa leje, përveç përballjes me masa administrative apo penale, do t’i ndalohet të punojë në shtet për 7 vite.
Ndër të tjera, Rama tha se çdo ndërtim që do të ndodhë në Shqipëri, do të ketë persona përgjegjës që do të japin llogari për çdo shkelje të lejes apo certifikatë false të hartuar dhe gjatë punimeve paraprake.
Më tej, kryeministri u shpreh se ndërtimet pa leje kanë ardhur në këtë pikë nga Partia Demokratike që kanë qenë më parë në qeveri.
“Sporti i ndërtimit pa leje është zhvilluar si sport kombëtar për shumë vite. Ne e kemi ulur çdo vit, por nuk e kemi sheshuar. Në këtë sport kombëtar që është nxitur edhe nga lart, ka qenë dikush para meje që e quante Bathoren mrekullinë e 8-të të botës se është i pari qytet që është ndërtuar pa leje.
Edhe punonjës të shtetit janë marrë me ndërtime pa leje. Këtu ka një pikë që në rast se konstatohet që punonjësi i shtetit, ka kryer punime pa leje, qoftë të pjesshme apo të përhershme, do të ndalohet të punojë në shtet për 7 vite nga momenti që do të konstatohet dhe do t’i njoftohet masa. Përveç pasojave të tjera si çdokush tjetër, pasoja të natyrës administrative dhe penale. Se kemi dhe ndryshimet në kodin penal që do t hyjë në konsultim publik.
Më tutje, ka parashikime të reja për detyrimin që subjektet që kapen në shkelje, të mbulojnë shpenzimet për prishjen dhe pastrimin. Dhe shpenzimet e prishjes dhe të pastrimit do t’i ngarkohen fajtorit.
Janë ashpërsuar masat administrative që kanë të bëjnë me mosdeklarimin e punëve që kryen, punimet pa leje në zonat me përparësi zhvillimi.
Do të ketë një ndryshim të qenësishëm të strukturës së monitorimit. Trupës së inspektimit të IKMT do t’i shtohen dhe dy persona të tjerë përgjegjëses që do të kenë rol mbështetës nga drejtoria e monitorimit pranë agjencive. Kjo do të bëjë që surprizat të minimizohen maksimalisht. Sepse çdo godinë dhe do leje do të lidhet me persona përkatës. Nuk do të jetë më faj anonim. U ndërtuan 5 kate mes Tiranës dhe faji është anonim. Çdo godinë do të lidhet me persona dhe personat do të përgjigjen për çdo certifikim të rremë apo të pasaktë të punimeve në çdo fazë.