Pavarësisht se mazhoranca shprehu vullnetin për t’i qëndruar marrëveshjes për reformën zgjedhore dhe për votimin e saj më 23 korrik, gjatë seancës parlamentare ditën e djeshme, ata i propozuan opozitës parlamentare një konsensus për të marrë votat e tyre në shkëmbim të ndryshimeve kushtetuese.
Kjo lojë me dy porta e Partisë Socialiste për reformën zgjedhore, brenda dhe jashtë parlamentit ka çuar ambasadoren e ShBA-së në vendin tonë, Yuri Kim në Parlament, aty ku zhvilloi dje një takim me kreun e grupit parlamentar socialist Taulant Balla.
Në këtë mënyrë duke iu përgjigjur dhe mesazheve të forta që vijnë nga kancelaritë e mëdha, edhe ambasadorët e SHBA-së dhe vendeve të BE-së kanë rritur presionin ndaj qeverisë dhe kryeministrit Edi Rama për miratimin e reformës zgjedhore.
Dhe për t’i dhënë përgjigje të gjitha dilemave lidhur me këtë reformë, kryeministri Edi Rama lajmëron se do të dalë sot në orën 13:00 para medieve në një konferencë të jashtëzakonshme për shtyp.
“Sot në 13.00 qëndrimi i PS për përmbylljen e procesit të reformës zgjedhore në Parlament brenda këtij sesioni të Kuvendit të Shqipërisë”, njofton Rama përmes rrjeteve sociale.