Rama: Parlamenti Europian rrëzoi amendamentin për Vjosë-Nartën, flamengot do të mbrohen dhe Zvërneci drejt zhvillimit

Kryeministri Edi Rama ka reaguar lidhur me debatin për zonën e mbrojtur Vjosë-Nartë, duke deklaruar se Parlamenti Europian ka rrëzuar një amendament që sipas tij ishte futur në mënyrë të papërshtatshme në Rezolutën për Shqipërinë.

Në një postim publik, Rama tha se çështja e Vjosë-Nartës nuk ka lidhje me vlerësimet pozitive që institucionet europiane po i bëjnë progresit të Shqipërisë në rrugën drejt anëtarësimit në Bashkimi Europian. Ai argumentoi se shumica e eurodeputetëve mbështetën raportin për Shqipërinë, ndërsa amendamenti në fjalë nuk mori mbështetjen e nevojshme.

Rama kritikoi protestat e javëve të fundit kundër projektit të planifikuar në zonën e Zvërnecit, duke pretenduar se ato kanë kaluar nga shqetësimet mjedisore në një përballje politike. Për të mbrojtja e flamengove dhe e ekosistemit të Vjosë-Nartës do të garantohet, ndërsa zhvillimi i zonës do të bazohet në një proces të plotë të Vlerësimit të Ndikimit në Mjedis, në përputhje me standardet e BE-së.

Postimi i plotë nga Rama

Ja edhe PARLAMENTI EUROPIAN e ndau “shapin” e stuhisë digjitale të dizinformimit nga “sheqeri” i zonës së mbrojtur Vjosë-Nartë, e cila nuk ka asnjë lidhje me zhvillimin që europarlamentarët e rrëzuar me votën e shumicës dërrmuese, futën qorrazi si amendament të Rezolutës për Shqipërinë.

Tani o është çmendur dhe korruptuar krejt Europa, që përmes Parlamentit të saj e vlerëson lart Shqipërinë dhe nxit anëtarësimin tonë sa më parë në BE, o ka diçka që nuk shkon me ata që e nisën protestën e javëve të fundit me mbrojtjen e flamengove dhe po e bitisin si luftë për pushtet në emër të flamengove!

Në çdo rast flamengot do të mbrohen, Vjosë-Narta do të mbrohet, Zvërneci do të zhvillohet bazuar në një Vlerësim të Ndikimit në Mjedis sipas standarteve të Bashkimit Europian dhe ne do të vazhdojmë ta ngjisim Shqipërinë në majën ku ndodhet shtëpia e Europës së Bashkuar