Rama për incidentin në Kuvend: Ballisti Agron Shehaj iku me vrap, prokuroria të bëjë detyrën

Kryeministri Edi Rama ka reaguar pas incidentit në Kuvend, ku kreu i partisë ”Mundësia” Agron Shehaj mori një dokument të klasifikuar sekret shtetror që lidhej me marrëveshjen me Shtetet e Bashkuara të Amerikës dhe u largua nga salla me vrap.

Përmes një videoje të publikuar nga momenti kur punonjësia rrëzohet te shkallët duke ndjekur Shehajn, kryeministri akuzoi kreun e Partisë Mundësia për veprim të papërgjegjshëm, duke e krahasuar atë me një “ballist” dhe duke u shprehur se disa zakone nuk ndryshojnë.

”Ky tipi që vjedh një dokument të klasifikuar dhe ia fut vrapit, është një ballist që ngre dhe ul hajdut kë i del përpara, por siç e shihni sot tentoi të ikte me vrap njësoj si ballistët pasi hynin në kotec për të grabitur pula, duke na dëshmuar botërisht se vesi del me shpirtin. Uroj po nuk shpresoj që prokuroria t’i tregojë vendin e përcaktuar nga ligji për grabitësit e dokumentave të klasifikuar kësaj sorre vjedhacake të mbushur me urrejtje, ndërkohë që i shpreh keqardhje vajzës së pafajshme duke falenderuar Zotin që shpëtoi pa dëme serioze nga rendja në panik pas hajdutit”,-shkruan Rama.