Rama sërish në QSUT, shefat e shërbimeve e presin me debate

Brenda 24 orëve kryeministri Edi Rama rikthehet në QSUT. Në fokus të takimit të sotëm ka qenë testimi i mjekëve, një zhvillim jo i mirëpritur prej këtyre të fundit. Shoqëruesit e kryeministrit janë kujdesur që t’i mbajnë kamerat larg këtij takimi të tij me ministrin e Shëndetësisë, Beqaj dhe me shefat e shërbimit në QSUT, si dhe me profesoratin e Universitetit të Mjekësisë.

Lapsi.al mëson se kryeministri Rama është ndeshur me kundërshtimin e shefave të shërbimit lidhur me testimin e tyre, ndërsa ai vetë është shprehur se ky është një proçes i pakthyeshëm. Mjekët janë të shqetësuar se si do të bëhet ky testim dhe nga kush. Nëse testimi bëhet nga profesorët e Universitetit të Mjekësisë dhe nga shefat e shërbimit, i bie që ata të mbajnë veten jashtë këtij proçesi. 

Në reagimet e ditëve të fundit, bluzat e bardha shprehen se kreditet dhe liçensa e mjekut janë të mjaftueshme për të dëshmuar profesionalizmin e tyre. Ministria e Shëndetësisë ka deklaruar se testimi i mjekëve dhe infermierëve do të kryehet brenda muajit shkurt.