Nga mbledhja e zgjeruar e grupit parlamentar të PS, kryeministri Edi Rama tha se protestat që synojnë bllokimin e aeroportit nuk gjejnë mbështetje te qytetarët e arsyeshëm, duke theksuar se Tirana nuk mund të kthehet në një hapësirë për aksione që paralizojnë funksionimin normal të vendit.
“Nuk mundet dot asnjë shqiptar i arsyeshëm që të pranojë që Tirana të bëhet territor sfilate për një turmë që shkon të bllokojë aeroportin”, u shpreh kryeministri. Ai shtoi se në protestat e zhvilluara në kryeqytet marrin pjesë edhe persona që vijnë nga Kosova, Maqedonia e Veriut dhe vende të tjera, duke pretenduar se protestojnë në emër të shqiptarëve.
Sipas Ramës, detyra e qeverisë mbetet ndërtimi i institucioneve dhe përmirësimi i shërbimeve për qytetarët, pavarësisht kritikave dhe presionit të krijuar në rrjetet sociale. Ai theksoi se qeverisja duhet të mbështetet te kontrata me qytetarët dhe jo te “algoritmi”, ndërsa nënvizoi se shumica e shërbimeve publike tashmë ofrohen online përmes platformave digjitale.
