Rama: Sulmet kibernetike ndaj Shqipërisë kërkojnë verifikim ndërkombëtar të autorësisë, kemi kapacitete të avancuara

Kryeministri Edi Rama deklaroi se Shqipëria ka kapacitete të avancuara për mbrojtjen kibernetike dhe se autorësia e sulmeve të fundit po verifikohet në bashkëpunim me partnerë ndërkombëtarë. Në podkastin “Flasim shqip”, Rama tha se vendi ka teknologji të avancuar për identifikimin e ndërhyrjeve.

“Ne kemi sot një teknologji të mbrojtjes kibernetike që është ‘top of the top’ dhe për këtë arsye kemi shumë kapacitete identifikuese të ndërhyrjeve malinje”. Rama konfirmoi se institucionet kanë një dosje për sulmet, por theksoi se atribuimi kërkon kujdes dhe verifikim. “Po kemi një dosje, por, sigurisht që unë nuk jam specialist që përcakton vendndodhjen e një llogarie dhe të bëj këtu ekspertin e IT-ve”.

Sipas kryeministrit, Shqipëria po bashkëpunon me aktorë të tjerë për të konfirmuar përfundimisht autorësinë. “Përpara se sa të dalim dhe të themi ‘është ky, është ai’, tek atribuimi që quhet, pra t’ia atribuosh një sulm dikujt, ta bëjmë këtë duke u siguruar për të vërtetën e gjetjeve tona përmes bashkëpunimit me aktorë të tjerë”.

Rama foli edhe për protestat dhe pretendimet lidhur me investimin në Zvërnec, duke mohuar një lidhje të projektit me Izraelin. “S’ka lidhje fare me ndonjë marrëveshje apo marrëdhënie mes Shqipërisë dhe Izraelit, por ku aktorë të dorës së parë janë dy vëllezër myslimanë, sirianë, qytetarë të Katarit”. Ai paralajmëroi gjithashtu për, siç i cilësoi, narrativa që nxisin përçarje fetare dhe etnike.

“Marrëdhënia e shqiptarëve dhe Shqipërisë me Izraelin është po kaq e rëndësishme sa marrëdhënia me vendet arabe, me të cilat kemi marrëdhënie vëllazërore”. Rama kujtoi në fund edhe rolin e shqiptarëve në shpëtimin e hebrenjve gjatë Luftës së Dytë Botërore. “Falë myslimanëve dhe shqiptarëve, këtu u shpëtuan të gjithë hebrenjtë.”