Raporti nga INSTAT, 70 viktima nga aksidentet në 4 muaj të 2021

Viktimat nga aksidentet rrugore mbeten në shifra të larta edhe për vitin 2021, aq sa mund të jenë më shumë sesa nga Covid-19. Në raportin e INSTAT, thuhet se në 4 muajt e parë të 2021 kanë humbur jetën nga aksidentet 70 viktima, 30% më shumë se përiudha janar-prill e vitit 2020. Shifrat vijnë në rritje prej vitit 2018, ku në të njejtën periudhë numri i aksidenteve me humbje jete ishte 61 viktima.

2020 solli uljen në 49 viktima, e kushtëzuar nga mbyllja totale në muajt mars e prill, ndërsa sot, kur ka kaluar 1/3 e vitit, numri i jetëve të humbura nga aksidentet shënon rritje të ndjeshme. Shkaqet nisin nga përdorimi i alkoolit që gjithsesi ka patur ulje e deri te sjellja e këmbësorit, ku referuar gjithmonë katër mujorit të parë, është bërë burim aksidentesh në 19.2% të rasteve.

Nga ana tjetër, edhe fatalitetet janë në rritje edhe aktualisht në muajin maj, ku kanë humbur jetën plot 16 persona. Viti 2016 shënoi kulmin e aksidenteve rrugore, me 2032 të tillë dhe me një numër rekord vdekjesh, plot 2778 persona. Vitet pasardhëse kanë shënuar ulje të ndjeshme, duke kulmuar në 12 muajt e fundit të cilat kanë qenë më të qetat e dekadës së fundit.

Teksa vendi i rikthehet normalitetit nga pandemia, 2021 po shfaq shifra shqetësuese në gjysmën e parë të vitit, numra të cilat e rendisin Shqipërinë ndër vendet më numrin më të lartë të vdekjeve nga aksidentet në rrugë në raport me popullsinë.