Reagon SHBA: Pretendohet se Doshi është përfshirë në veprimtari kriminale

Në një deklaratë jo të zakontë, Ambasada e Shteteve të Bashkuara të Amerikës ka reaguar sot për zhvillimet politike në Partinë Socialiste. Ambasada e SHBA shprehet se "pretendohet se Tom Doshi është përfshirë në veprimtari kriminale" dhe mirëpret vendimin e PS.

Gjithashtu, Ambasada nxit të gjitha partitë politike në Shqipëri të largojnë individët e përfshirë në veprimtari kriminale apo korruptive.

Deklarata e plotë e SHBA:

“Shtetet e Bashkuara mirëpresin vendimin e Partisë Socialiste të Shqipërisë për të përjashtuar Z. Tom Doshi, i cili pretendohet se është përfshirë në veprimtari kriminale. Shtetet e Bashkuara e marrin seriozisht kanosjen e krimit dhe korrupsionit ndaj shoqërive të lira dhe demokratike. Nxisim të gjitha partitë politike në Shqipëri të largojnë individët e përfshirë në veprimtari kriminale apo korruptive. Mbështesim me forcë punën e kuvendit për të hartuar legjislacion në përputhje me Rezolutën e 24 dhjetorit 2014. Më tej, i bëjmë thirrje Prokurorit të Përgjithshëm të Shqipërisë të hetojë dhe ndjekë penalisht kriminelë dhe zyrtarë të korruptuar në të gjitha nivelet”.