Kreu i Prezencës së OSBE-së në Shqipëri, ambasadori Michel Tarran u takua sot me Drejtorin e ri të Përgjithshëm të Burgjeve, Adriatik Kupi, për ta uruar për detyrën e re, për të rikonfirmuar mbështetjen e Prezencës për reformën në sistemin penitenciar dhe për të diskutuar bashkëpunimin në të ardhmen.
Kontributi i Prezencës në sistemin penitenciar ndër vite është fokusuar në pesë fusha kryesore: mbështetje për hartimin e legjislacionit dhe politikat në sistemin penitenciar; rritje e kapaciteteve të personelit në burgje dhe paraburgim; ngritja e Shërbimit të Provës; parandalimi dhe lufta ndaj ekstremizmit të dhunshëm dhe radikalizimit që çojnë në terrorizëm; mbështetje për regjimin e posaçëm në burgjet e sigurisë së lartë; si dhe ngritjen e programit të parë ndërdisiplinar të Masterit Ekzekutiv në Kriminologji në Universitetin e Tiranës.
Gjatë diskutimit u trajtua edhe rëndësia e uljes së përdorimit të tepruar të masës “arrest në burg.” Ambasadori Tarran përshëndeti vendimin e Gjykatës së Lartë, të muajit maj, i cili rikonfirmon se caktimi i masës “arrest në burg” ka natyrë përjashtimore dhe mund të vendoset vetëm kur masat e tjera janë të papërshtatshme, i justifikuar vetëm mbi bazën e arsyetimit konkret, të individualizuar, dhe të rishikueshëm.
“Prezenca e OSBE-së në Shqipëri mbetet e gatshme të mbështesë Drejtorinë e Përgjithshme të Burgjeve në çuarjen përpara të reformave që kontribuojnë për një sistem penitenciar më efektiv, më human dhe më modern. Objektivi ynë i përbashkët është një sistem që mbron të drejtat e njeriut, rrit sigurinë publike dhe mbështet riintegrimin e suksesshëm në shoqëri të të dënuarve,” u shpreh ai.
Prezenca do të vijojë mbështetjen e reformës penitenciare në vitin 2026 përmes veprimtarive të fokusuara në promovimin e aksesit në drejtësi, forcimin e kapaciteteve të sistemit penitenciar, përdorimin e masave alternativave dhe mbrojtjen e të drejtave të njeriut.