Reforma Territoriale, Gorrea zbardh prapaskenat e mbledhjes me Ramën: Disa kryetarë ishin të emocionuar

Kryetari i Bashkisë Divjakë, Josif Gorrea, ka reaguar në mbledhjen e Këshillit Bashkiak për takimin e zhvilluar në Kuç me kryeministrin Rama, ku në fokus ishte Reforma Territoriale. Gorrea sqaroi se takimi me kryeministrin ishte me dyer të mbyllura, duke hedhur dritë mbi qëndrimin e tij gjatë diskutimeve. Ai theksoi se paçka takimit dhe diskutimeve për reformën, pozicioni i tij mbetet i njëjtë: Bashkia Divjakë duhet të ruhet si njësi më vete.

”Ishte një takim i mbyllur. U diskutua gjatë e gjerë si grupim politik, që unë e quaj një hap të madh përpara. Shprehëm secili mendimin e tij. Kryeministri e la të hapur bisedën. Secili të shprehë mendimin e tij të pastër. Disa kryetarë të emocionuar e të nxituar ja ndërprisnin fjalën.

Po flas me pastërti çfarë ka ndodhur. Edhe në atë takim, nuk kisha detyrim të shprehem për të tjerët, por për veten time. Qëndrimi im ka qenë i pastër. Nuk ka ndryshuar në asnjë moment nga ajo që kam deklaruar. Edhe në atë takim e mbrojta fort idenë që pse bashkia duhet të qëndrojë. E para te Komisioni i Maznikut ka disa mospërputhje.

Kapa disa gabime që do iu a bëj me dije edhe ju. E dyta bëra një krahasim Lushnje-Divjakë. Ndoshta Komisioni në atë citat, i referohet faktit që ne bëmë një mbledhje që kemi qenë të pranishëm. Në atë takim, përsëri, ju ndoshta e keni parë edhe në media, përfaqësues të lartë të PS u shprehën qartë që nuk do ketë ndryshime në qarkun Fier. Mbrojta fort faktin që kam qenë jo i informuar. Radhita atë që thashë më sipër”, tha ndër të tjera Gorrea.