Rrëshqitje e madhe toke në aksin Përrenjas-Librazhd, rrezikon shtyllën e tensionit të lartë

Autoritetet kanë stakuar linjën e tensionit të lartë dhe po planifikojnë demontimin e shtyllës së tensionit, pasi kjo po rrëshqet për shkak të rrëshqitjes së tokës në aksin Përrenjas-Librazhd, situatë që vijon të rëndohet.

Prokuroria e Elbasanit ka nisur hetime kryesisht ndaj kompanisë që po punon për zgjerimin e Korridorit VIII në zonën e Dragostunjës, ku ka ndodhur rrëshqitja masive. Hetimi do të fokusohet tek shkaqet që shkaktuan rrëshqitjen, e cila ka dëmtuar rrugën, linjën hekurudhore dhe linjat elektrike, duke rrezikuar më tej sigurinë e qarkullimit.

Institucionet kompetente, në bashkëpunim me prokurorinë, do të verifikojnë gjithashtu lejet për marrjen e inerteve në Shkumbin dhe zbatimin e tyre. Hetimet nisën pas një denoncimi me pamje filmike të ngjarjes. Objekti i hetimit mbulon të gjithë rrugën nga Peqini deri në Qukës, për shkak të shfrytëzimit masiv të lumit Shkumbin në disa zona.

Situata në segmentin rrugor është përkeqësuar ndjeshëm në orët e fundit, për shkak të rrëshqitjes së tokës dhe fundosjes së një ure, duke rritur rrezikun për qarkullimin e automjeteve dhe këmbësorëve. Rreth orës 22:00 të mbrëmjes së djeshme, autoritetet ndaluan fillimisht lëvizjen e automjeteve dhe më pas edhe qarkullimin e këmbësorëve dhe mjeteve të emergjencës, përfshirë zjarrfikëset, policinë dhe ambulancat, për shkak të rrezikut të lartë dhe pamundësisë për të identifikuar zonat e dëmtuara në errësirë.