Rrethuan Kryeministrinë, Gjykata e Tiranës liron 14 protestuesit: Arrestimi ishte i jashtëligjshëm

Protestuesit e arrestuar mbrëmjen e 1 shtatorit, pasi rrethuan godinën e Kryeministrisë në momentin kur kryeministri Edi Rama ndodhej brenda në zyrën e tij, janë lënë të lirë nga Gjykata e Tiranës.

Ndaj 14 protestuesve rëndonin dyshimet për kryerjen e veprave penale “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Prishja e qetësisë publike” dhe “Pengimi i qarkullimit të mjeteve të transportit”. Gjatë seancës gjyqësore, protestuesit kërkuan që arrestimi i tyre të shpallej i paligjshëm dhe të liroheshin pa asnjë masë sigurie. Ata mohuan të kenë kryer ndonjë vepër penale.

Jashtë ambienteve të gjykatës, qytetarë të mbledhur në mbështetje të protestuesve kërkuan lirimin e tyre dhe shprehën akuza ndaj drejtuesve të lartë të qeverisë. “Arrestoni Ramën, arrestoni Ballukun!”, ishte një nga thirrjet e përsëritura gjatë zhvillimit të seancës.

Të arrestuarit janë Dritan Goxhaj, Junik Matoshi, Edison Lika, Erlind Almeta, Sokol Bushi, Lulzim Gjini, Valtion Shameti, Florian Manarkolli, Desiderjo Alimuçaj, Bora Mitrovica, Arvina Lleshi, Ylli Brahaj, Arben Kola dhe Aumiraldi Dalliu.

Ata u arrestuan pasi protestuesit rrethuan godinën e qeverisë, menjëherë pasi u bë e ditur se kryeministri ndodhej në zyrën e tij. Pas disa orësh përplasjeje dhe rezistence nga protestuesit, Rama u largua nga godina nën masa të shtuara sigurie. Protestat qytetare kundër qeverisë vijojnë prej më shumë se tre muajsh. Pjesëmarrësit kërkojnë dorëheqjen e kryeministrit Edi Rama.