Shqipëria po shënon një rritje të numrit të personave që kërkojnë mbrojtje ndërkombëtare, duke reflektuar ndryshimet në flukset migratore që prekin rajonin. Sipas të dhënave të INSTAT-it, gjatë vitit 2025 u regjistruan 144 kërkesa për azil, ose 38% më shumë krahasuar me një vit më parë. Të dhënat tregojnë se shtetasit egjiptianë përbëjnë grupin më të madh të azilkërkuesve, me 39.6% të totalit të aplikimeve. Ata ndiqen nga shtetasit afganë me 11.8%, ndërsa është vërejtur edhe një rritje e kërkesave nga qytetarët palestinezë, të cilët po e konsiderojnë Shqipërinë si një mundësi për strehim dhe mbrojtje.
Aplikimet janë përqendruar kryesisht në muajt gusht, shtator dhe tetor, periudhë gjatë së cilës u paraqitën mbi 63% e të gjitha kërkesave për azil. Ky trend lidhet me lëvizjet sezonale të emigracionit dhe rrugët migratore që kalojnë në rajon. Sipas publikimit të INSTAT-it, Shqipëria nuk po shihet më vetëm si një vend tranziti, por në disa raste edhe si destinacion për personat që kërkojnë mbrojtje ndërkombëtare. Kjo pritet të rrisë përgjegjësitë e institucioneve në trajtimin e procedurave të azilit.
Raporti sjell edhe të dhëna mbi shtetësinë shqiptare. Gjatë vitit 2025, 495 persona fituan shtetësinë shqiptare, ku pjesën më të madhe e zënë qytetarët me origjinë nga Kosova. Në listë pasojnë shtetas nga Turqia, Maqedonia e Veriut dhe Italia. Në të njëjtën periudhë, 173 persona hoqën dorë nga shtetësia shqiptare. Grupmosha 30–39 vjeç rezulton të jetë më e përfaqësuara si mes atyre që fituan shtetësinë, ashtu edhe mes atyre që vendosën ta lënë atë. Megjithëse shifrat mbeten relativisht të ulëta, të dhënat e vitit 2025 tregojnë se Shqipëria po përballet me një rol gjithnjë e më të rëndësishëm në menaxhimin e migracionit dhe kërkesave për mbrojtje ndërkombëtare.
AZILKËRKUESIT NË 2025
144 PERSONA
+38%
GJEOGRAFIA E SHTETASVE QË FITUAN SHTETËSINË
56,1 % nga Kosova
20,1 % nga Turqia
4,8 % nga Maqedonia e Veriut
4,8 % nga Italia
LËNIA E SHTETËSISË SHQIPTARE
173 persona
Mosha 30-39 vjeç
AZILKËRKUESIT NË SHQIPËRI
Egjipt 39,6 %
Afganistan 11,8 %
Palestinë 9,7 %