Rriten pagat për ushtarakët, edhe shtesa për vjetërsi në shërbim

Qeveria parashikon të ndryshojë ligjin për “Statusin e ushtarakut”, duke rritur shpërblimet, rritjen në pagë dhe ndihma të tjera për ta. Një nga rishikimet e kërkuara është që në llogaritjen e rrogës të përfshihet edhe shtesa për vjetërsi në shërbim

Në momentin që ata do të largohen nga forcat e armatosura do të marrin dhe shpërblim. Më konkretisht ushtarët dhe detarët do të marrin 15 paga, duke e llogaritur nga rroga e fundit që kanë marrë, nënoficerët 20 paga dhe oficerët deri në 25. Edhe në rastin kur do të dërgohen në stërvitje, trajnim dhe kurse jashtë vendit veç trajtimit financiar do të kenë mundësi të marrin edhe një fond për shpenzimet vetjake.

Ndihmë do t’iu jepet dhe studentëve të Akademisë Ushtarake qoftë brenda dhe jashtë vendit do të marrin rrogë të barabartë me ushtarin e parë. Sa i përket atyre që kryejnë shërbim 24 orësh do të kenë dy mundësi përfitimi ose pushim ose shtesë për pagë për orët e natës. Në ligj do të hiqet kufiri për thirrjen në shërbim nga mosha 19 deri në 30 vjeç, kjo duke lënë në fuqi përcaktimet në ligjin për karrierën. Forcat e Armatosura do të kenë me ligj të drejtën të përfitojnë edhe lehtësira në shërbime sociale. Gjithashtu, në draftin e publikuar në Fletoren Zyrtare vendoset dhe kthimi në detyrë të ushtarakëve që janë në rezervë.

MASA E RRITJES SË PAGAVE

– ushtarët/detarët, deri në 15 (pesëmbëdhjetë) paga;

– nënoficerët, deri në 20 (njëzet) paga;

– oficerët, deri në 25 (njëzetepesë) paga.