Dy nxënës të fshatit Morinë kanë humbur jetën që prej ndërtimit të Rrugës së Kombit për shkak të mungesës së mbi ose nën kalimit pranë shkollës.
Ndërsa dhjetëra të tjerë e rrezikojnë jetën çdo ditë.
“Kemi disa nxënës të vdekur. Është i domosdoshëm një nënkalim. Të gjithë fëmijët kalojnë në këtu.”
Mungesa e rrugës dytësore në zonën e banuar dhe nën apo mbi kalimit pranë Shkollës i detyron nxënësit që të ecin buzë rrugës ku rrezikohen nga makinat.
“Fëmijët dhe mësuesit janë të rrezikuar çdo ditë sepse kalojnë trafikndarsen.”
Më të rrezikuarit janë fëmijët e një lagjeje matanë rrugës, të cilët për të shkuar të shkollë duhet të presin mes për mes autostradën.
Banorët dhe mësuesit e shkollës thonë se alarmin e kanë ngritur prej kohësh, por as koncensionari Salillari dhe as Ministria e Transporteve nuk po i japin zgjidhje kësaj problematike që rrezikon jetën fëmijëve
“Kemi bërë disa herë ankesë por nuk na është marrë për bazë.”
Për të qarkulluar në rrugën e kombit të gjithë automjetet duhet të paguajnë një tarifë që varion nga 5 deri në 22 euro që i siguron koncensionarit Salillari disa dhjetëra milionë euro fitime.
Por siç duket shumë pak nga këto para shkojnë për mirëmbajtjen e Rrugës së Kombit dhe plotësimin e infrastrukturës që çdo ditë po merr jetë njerëzish.