Ruçi i kthehet kreut të KLGJ: Plotësoni vakancat, Shqipëria po mbahet peng deri në Bruksel

Kreu i Kuvendit të Shqipërisë Gramoz Ruçi i është drejtuar kryetares së KLGJ-së Naureda Llagani gjatë raportimit të saj në Kuvend për vonesat e plotësimit të vakancave në Gjykatën e Lartë dhe Gjykatën Kushtetuese.

Ruçi tha se nuk ka arsye që këto dy hapa të mbajnë peng Shqipërinë deri në Bruksel.

“Kuvendi është i interesuar kur do të plotësohen vakancat në GJL dhe GJK. Nuk ka asnjë arsye që ju me moshapjen e vendeve në Gjykatën e Lartë të mbahet peng Shqipëria deri në Bruksel.

Kur themi të hapen menjëherë dhe të përfundojë sa më shpejt. Të mos jemi te momenti që të bëhet një mbledhje e posaçme e Kuvendit për këtë pikë”, tha Ruçi.

Llagani iu përgjigj pyetjes së deputetit Zef Shtjefni lidhur me hapat e drejtësisë lidhur me hapat e organeve të drejtësisë për masat ndaj gjyqtarëve dhe prokurorëve të korruptuar.

“Kjo ka qenë lajtmotivi i Reformës në Drejtësi. Po punojmë intensivisht. KLGJ është një organ që bashkëpunon mirë me ILD. Këshilli do marrë shumë masa për ata gjyqtarë që janë të korruptuar”, deklaroi Llagani.

Kreu i Kuvendit Gramoz Ruçi ka njoftuar se në datë 30 qershor do të ketë mbledhje të Këshillit të Legjislacionit për kërkesën e opozitës për ndryshimin e sistemit.

“Me 30 qershor do të ketë mbledhje të Këshillit të Legjislacionit për kërkesën e opozitës parlamentare për ndryshimin e sistemit”, tha Ruçi.

Kjo vjen pas kërkesës së deputetëve të opozitës të dërguar në Kuvend. Ata kanë kërkuar hapjen e listave zgjedhore, duke paralajmëruar se nuk do ta votojnë Reformën Zgjedhore.