Salianji rikthehet tek Berisha? Koka: Ka pasur pajtime edhe më parë

Gazetari Bledian Koka në komentet e tij për ndryshimet statutore në PD, u ndal veçanërisht te mungesa e një “neni Salianji” në statut, të cilën e konsideroi një element pozitiv. Sipas tij, fakti që nuk është parashikuar një nen i tillë tregon se përplasjet brenda Partisë Demokratike nuk kanë qenë domosdoshmërisht personale. Koka la të hapur mundësinë që figurat e përfshira në konflikt, si Ervin Salianji dhe Sali Berisha, mund të shkojnë sërish drejt pajtimit, duke kujtuar se edhe më herët në PD ka pasur periudha përplasjesh që më pas janë tejkaluar.

Ai kritikoi gjithashtu zgjerimin e Këshillit Kombëtar nga 150 në 200 anëtarë, duke e konsideruar si një lëvizje jo domosdoshmërisht efikase, pavarësisht argumentit për përfshirje më të gjerë të diasporës dhe organizatave partnere. Koka theksoi se sfida kryesore e PD-së mbetet qartësimi i vizionit politik dhe ofrimi i një opozite më funksionale me alternativa konkrete për qytetarët.

“Lajmi i mirë është që nuk ka një nen Salianji, sepse për mua kjo do të ishte problem, kjo do ta vinte PD nën akuzë, që gjithë betejën kundër Salianjit e bëri personale, se kishte frikë Salianjin se mos i merrte partinë zotit Berisha. Dhe pika e dytë e kësaj është që Neni Basha është prapë aty. Nuk ka një nen në statutin e ndryshimeve që mund të quhet neni Salianji, që do të thotë që ai vazhdon të jetë një interpretim i brendshëm i partisë.

Fakti që sot nuk kemi dhe nuk mund të diskutojmë për një nen Salianji në statutin e ri të Partisë Demokratike, më bën të besoj që kjo nuk ka qenë personale, por ka qenë për shkak të disa situatave, që asnjëra palë, po as tjetra që mori përsipër ta bënte antagonizmin nuk e sqaruan dot deri në fund sepse ata që dinë çështjen nga brenda dinë që përpara se të vinim te konflikti kemi patur dhe negociata. Pyetja është që ata që ishin pjesë e konfliktit, sot janë zënë nesër mund të pajtohen prapë. Partia Demokratike ka treguar këtë gjënë”, tha Koka në A2 CNN.