Në një intervistë për gazetaren Matilda Mcini në Ora News, mjeku Kita Sallabanda u shpreh se vaksina kineze nuk ka një dokumentacion.
Sipas Sallabandës, në disa vende ka treguar se është efikase kjo vaksinë dhe theksoi se është më mirë që qytetarët të vaksinohen se sa të mos vaksinohen fare.
Sallabanda: Dokumentacioni i Sputnik V është duke u shqyrtuar, ndërsa sa i përket vaksinës kineze, nuk ka një dokumentacion për këtë vaksinës, dhe prandaj nuk mund të jepet një opinion në raport me të. Si vaksinë ajo është përdorur në shumë vende si Turqia apo në Amerikën Latine. Sigurisht nuk është përdorur në vendet e BE-së dhe në SHBA. Unë nuk mund ta them se vaksina është efikase apo jo. Ata që e kanë bërë tregojnë për një efikasitet 70-80%. Por kemi shifrat të ndryshme të kësaj vaksine nga shtete të ndryshme.
Prandaj nuk mund të jepet leje për tu përdorur derisa të jepet një dokumentacion nga autoritetet kineze gjë të cilën nuk e di pse nuk e japin. Në këtë pikë bazohemi vetëm në rezultate dhe nuk mund të japim një opinion të saktë. Në shumë vende që nuk janë marrë vaksinat e mira le të themi, është marrë vaksina kineze. Sigurisht që është më mirë që të merret jnë vaksinë se sa pa vaksinë fare. Sipas studimeve është vërtetuar se ata që kanë marrë vaksinat formojnë një imunitet mbi 60% dhe kapaciteti i atyre që kanë bërë vaksinën nuk e transmetojnë virusin në këtë nivel.
Sallabanda shtoi se çdo shtet duhet të administrojë vaksinat që ka sipas një strategjie dhe se vaksinimi i personelit mjekësor është i domosdoshëm.
Sallabanda: Çdo shtet duhet të administrojë vaksinat që ka sipas një strategjie. Sipas meje bluzat e bardha duhet të vaksinohen të parët së bashku me të moshuarit. Bluzat e bardha sepse janë të parët që përballen me këtë virus dhe mund të infektojnë të tjerët. Bluzat e bardha po ashtu janë të nevojshëm që të ndihmojnë popullatën në luftën më pandeminë. Në Spanjë spitalet ishin kthyer në qendra infektimi dhe prandaj u bë i detyrueshëm vaksinimi i tyre. Më pas duhet të vazhdohet me vaksinimin e mësuesve dhe personave që janë në risk shëndetësor.