E ftuar në emisionin “Dekalog” të gazetarit Roland Qafoku, deputetja e Partisë Socialiste, Sara Mila, komentoi zhvillimet politike në vend, opozitën, projektet strategjike të zhvillimit dhe përgjegjësinë e saj si përfaqësuese e mazhorancës.
Mila u shpreh se Partia Demokratike është sot një forcë politike e fragmentarizuar, pa një vizion të ri dhe pa një alternativë bindëse për qytetarët. Sipas saj, opozita përpiqet të mbijetojë politikisht duke u kapur pas çdo proteste qytetare, çka e ka shndërruar atë në një grumbullim pakënaqësish, pa një bosht të qartë ideologjik apo programor.
Deputetja ndaloi edhe te debatet që kanë shoqëruar projektet e zhvillimit turistik në zona të mbrojtura, si ishulli i Sazanit dhe Zvërneci. Ajo pranoi se komunikimi institucional mund të ketë pasur mangësi, por theksoi se çdo projekt zhvillohet në përputhje me standardet e Bashkimit Evropian dhe me detyrimet që burojnë nga Kapitulli 27 për mjedisin.
Sipas saj, asnjë investim nuk mund të marrë dritën jeshile nëse cenon angazhimet e Shqipërisë në procesin e integrimit evropian. Mila shtoi se një pjesë e protestave kundër këtyre projekteve është ndikuar nga interesa politike, duke argumentuar se kauzat mjedisore janë përdorur nga opozita për përfitime politike.
Deputetja u pyet edhe nëse do ta mbështeste një kërkesë të re të SPAK-ut ndaj ish-zëvendëskryeministres Belinda Balluku.
Në fund të intervistës, gazetari Roland Qafoku vlerësoi mënyrën se si deputetja është pozicionuar në debatet publike, duke theksuar se ajo është rritur politikisht dhe është shndërruar në një nga zërat më aktivë të Partisë Socialiste në media.
Pjesë nga intervista:
Roland Qafoku: Në qoftë se vjen një kërkesë tjetër nga SPAK-u për zonjën Balluku, ju do ta votoni?
Sara Mila: Unë, në përgjithësi, nuk e kam këtë me “nëse”. Unë veproj kur gjërat ndodhin. Se “nëse”, “nëse”… ka shumë “nëse”. Kur të vijë kërkesa…
Roland Qafoku: Ju fikni edhe celularin…
Sara Mila: Unë s’e kam fikur telefonin asnjëherë.
Roland Qafoku: Jo ju, të tjerët.
Sara Mila: Unë mendoj që edhe kjo dëshira për të vënë përpara përgjegjësisë të gjithë kastën tonë, që në fakt është edhe një kastë e re politike, për “nëse ndodh kjo”, “çfarë do bëni”, “nëse të ndodhë”… Kur të ndodhë, ju themi çfarë do bëjmë. Se po nuk ndodh, ku shkojnë gjithë këto fjalimet tona? Nuk ecet me “nëse”.
Roland Qafoku: Këtë taktikën e shmangies së përgjigjeve e ke nga trajnimet tuaja në PS apo e ke pasur vetë?
Sara Mila: Po më thoni që e kam nga Akademia.
Roland Qafoku: Po, nga akademia.
Sara Mila: E gjykoni vetë, mendoj unë… Çfarëdo që mund të them, nuk do të besohet.
Roland Qafoku: Unë jam i pari që kam ndryshuar mendim për ty. Je rritur si politikane sepse tani nuk është më befasi të bësh një hard talk me Sara Milen. Mbi supet e tua mbajte shumë gjëra që edhe s’të takojnë sepse ti je një politikane e re, një vit ke nuk ke qenë ministre, nuk ke qenë pjesë e ekzekutivit, por megjithatë Partisë Socialiste i shërben shumë.
Sara Mila: Unë jam pjesë e këtij ekipi, dhe çfarë rëndon mbi Partinë Socialiste, rëndon edhe mbi mua padiskutim. Kur bëhet fjalë për familjen tonë politike ajo rëndon 100% edhe mbi mua.