Sazan Guri në protestë: Kauza mbi të gjitha, asgjë të mos na përçajë

Ambientalisti Sazan Guri mbajti një fjalim të fortë gjatë protestës së 102-të të zhvilluar para Kryeministrisë, ku bëri thirrje për bashkim dhe qëndresë qytetare. Guri e cilësoi tubimin si një formë të rëndësishme të rezistencës qytetare, duke theksuar se kauza e përbashkët duhet të jetë mbi çdo mosmarrëveshje apo hatërmbetje.

“Qytetarë, prej ditësh po mbajmë një protestë, por më shumë se kaq, kjo është një qëndresë. Kjo është rezistencë qytetare. Ne i themi popullit të bashkohet drejt këtij sheshi. Ky është flamuri që valëvitet çdo ditë mbi kokat tona”, u shpreh ai.

Duke iu referuar pedagogëve dhe profesorëve të pranishëm në protestë, Guri bëri thirrje që mesazhi i tyre të përcillet edhe te kolegët e tjerë. “Duhet të trokasim edhe te profesorët e tjerë. Jemi si asnjëherë tjetër në këtë ditë të keqe. Bijtë e saj nuk duhet të kursehen më”, deklaroi ambientalisti.

Guri solli në vëmendje edhe një shprehje të një nëne mirditore, duke e lidhur atë me nevojën për solidaritet mes qytetarëve. “Kauza është më e rëndësishmja. Ajo na mbledh, na organizon dhe na bën të harrojmë zënkat. Ky është një shesh magjik, një bajrak magjik”, përfundoi Sazan Guri.