“S’e dimë sa do zgjasë kjo gjendje”, Rama shpjegon paketën e masave financiare të marra kundër koronavirusit

Kryeministri Edi Rama ka shpjeguar më në detaje paketën financiare që është marrë nga qeveria në kuadër të forcimit të masave për të përballuar situatën kundër koronavirusit.

Në një lidhje për emisionin ‘Opinon’, Rama tha se buxheti i vendosur në funksion të Ministrisë së Shëndetësisë është drejtpërdrejtë i dedikuar për nevoja që lidhen me asistimin e të gjithë atyre që do të infektohen apo do t’i referohen ndihmës në spital. “Drejtpërdrejt për të mbështetur mjekët dhe personelin shëndetësor. Shpërblimi i mjekëve është veç. Ne kemi thënë që të gjithë mjekët, infermierët që janë të përfshirë në vijën e parë në fund të muajit ku jemi, bashkë me rrogën do të marrin edhe 1 mijë euro bonus.”, tha Rama.

Fevziu: Në këtë buxhet përfshihet edhe blerja e tamponëve?

Rama: Gjithçka, por koha është e papërcaktuar nuk e dimë sa do të zgjasë kjo gjendje dhe për këtë arsye duhet te jemi të furnizuar vijimësisht.

Fevziu: Dukej sikur kishte tone alarmante në fjalën tuaj sot. E di sepse edhe unë e jetoj situatën. A keni një plan afatgjatë që të dini ku mund të shkojmë në rrethana përkeqësuese?

Rama: Ajo që më alarmon është çdo shenjë pakujdesje nga qytetarët. Nëse ne kufizojmë orarin për këmbësorët, është e kuptueshme që do të ketë më shumë radhë në dyqanet ku bëhen shpenzimet, por është e patolerueshme të turremi të gjithë tek dera. Dhe përfitoj nga rasti t’ju them: ju lutem mos hedhim në plehra një sakrificë kaq të madhe, sepse pastaj i bie të vrasim veten.

Fevziu: Sepse 2 orëshi i lëvizjes është i pamjaftueshëm dhe vetvetiu do të krijohen radha. A ishte kjo zgjidhja më e mirë apo mund të ishte bërë diçka tjetër?
Rama: E thonë se nuk i shohin avionët që hedhin bomba, nuk i shikojnë ushtarët e armikut, por po të ishte kështu do vraponin të bënin ato që janë të domosdoshme. Arsyeja pse alarmohem është se disa njerëz se (edhe pse shumë pak, por mjaftueshëm të për rrezikuar të tjerët) e trajtojnë orarin e lëvizjes si një mundësi për të dalë edhe pa kujdes, edhe pa nevojë.

Artan Hoxha: E kishim parashikuar që vendosja e fashës së orareve do të krijonte radhë.
Rama: Patjetër që nuk duhet shkencë, që do të kishte më shumë njerëz në radhë, por nga ana tjetër është shumë e rëndësishme që njerëzit të kuptojnë që nuk ka vlerë asgjë që bëjnë nëse nuk rrinë në radhë. Në SHBA ka dalë një video një radhë me kilometër ku njerëzit rrinë dhe respektojnë distancën. Mbarojnë më shpejt dhe nuk infektojnë njëri-tjetrin. Përsa i përket bankave, do ketë tolerancë nëse ka ende njerëz që duan të mbarojnë punë. Nëse kemi një orar në bankë që është ai që kemi përcaktuar. Nga ora 6 deri në ora 10 dhe pastaj nga ora 4 deri në ora 6. Nëse ka njerëz të cilët janë në radhë dhe erdhi ora 10 natyrisht ka tolerancë për të vazhduar për t’ju shërbyer.

Artan Hoxha: Me del polici më vë gjobë.
Rama: Është shumë e thjeshtë, kur ti shkon në bankë dhe ke bërë një veprim në bankë, ti ke provon që ke qenë në bankë. Nëse je në bankë ke një faturë që mund t’i tregohet policisë.
Duke folur për veprimet dhe kujdesin e qytetareve, Rama tha: Po vazhduam kështu deri në fund dhe po e mbajtëm deri në fund, jo si kombëtarja që në fund ha golat, ne do dalim mirë nga kjo histori dhe nuk do biem pre e pakujdesisë sonë në një formë që mund të na prodhojë një katastrofë njerëzore.