Sejdini: Mbetjet që do të importohen do të digjen kur të kalojnë mbi trupin tim

Kryetari i Bashkisë së Elbasanit Qazim Sejdini ka hedhur poshtë spekulimet për djegie të mbetjeve të importit në fabrikën e re që do të përfundojë këto ditë.

Ai thotë se do të digjen plehra kur të kalojnë mbi trupin e tij. Këtë betim, Sejdini e bëri në mbledhjen e Këshillit Bashkiak të këtij qyteti,

pas interesimit të këshilltarëve mbi spekulimet rreth fabrikës së djegies, e cila  përfundon këto ditë në impiantin e ri të përpunimit.

“Nëse ajo fabrikë do jetë jashtë standardeve dhe do të ketë qoftë edhe një bullon të ndryshkur nuk do të merret në dorëzim dhe kjo është taksative.

Kapaciteti i djegies së fabrikës së ngritur në impiantin ë përpunimit të mbetjeve është 150 ton.

Në Elbasan prodhohen mesatarisht 130 ton plehra dhe nëse i shtohen edhe mbetjet e zonave përreth e kalon 150 ton.

Ta harrojë kushdo se do të sjellë plehra në Elbasan. Ta harrojë.

Vetëm nëse plehrat kalojnë mbi trupin tim, do të digjen në Elbasan”- deklaroi sot kryebashkiaku i Elbasanit Qazim Sejdini.