Sezoni, Velipoja zgjeron ofertën për plazhe

Velipoja është gati të mirëpresë një numër më të madh vizitorësh këtë sezon turistik, falë zgjerimit të ofertës në vijën bregdetare. Duke nisur nga kjo fundjavë, do të vihen në funksion edhe dy zona të reja plazhi të menaxhuara, duke rritur kapacitetin për pushuesit.

Sipas autoriteteve lokale, këtë vit është shtuar edhe sipërfaqja e plazheve publike, duke u ofruar më shumë hapësira falas familjeve dhe vizitorëve që zgjedhin të kalojnë pushimet në bregdet.

Paralelisht me zgjerimin e plazheve, janë realizuar ndërhyrje në infrastrukturë, pastrimin e zonës bregdetare, sistemimin e shërbimeve dhe forcimin e masave të sigurisë për pushuesit.

Me kushte të përmirësuara, një kombinim të plazheve publike dhe atyre të administruara, si edhe çmime konkurruese, Velipoja synon të mbetet një nga destinacionet kryesore të turizmit veror në Shqipëri. Autoritetet presin që fundjava të shënojë edhe nisjen e fluksit të lartë të vizitorëve, si vendas ashtu edhe të huaj.