SPAK ka ngritur ndaj ish-zv.kryeministres dhe ish-ministres së Infrastrukturës, Belinda Balluku, akuzat për “fshehje ose deklarim të rremë të pasurive” dhe “korrupsion pasiv të funksionarëve të lartë shtetërorë”, pas hetimeve të kryera nga prokurori Dritan Prençi. Në emisionin “Top Story”, kreu i partisë ”Mundësia” Agron Shehaj dhe analisti Albatros Rexhaj debatuan mbi dosjen dhe akuzat ndaj Ballukut.
Shehaj tha se në dosje ka komunikime mes Ballukut dhe arkitektit për ndërtimin e vilës në Green Coast. ”Janë komunikime mes Belinda Ballukut dhe arkitektit të saj, ku diskutohet si të bëjnë vilën, pishinën që të shkojë direkt në det dhe dy hidromasazhe si një nga hotelet më të famshme të Santorinit”,-tha Shehaj.
Sipas Shehajt, çështja lidhet edhe me mënyrën e financimit të vilës. ”Problemi është që vila nuk është bërë me paratë e Belinda Ballukut. Belinda Balluku nuk ka harxhuar asnjë lek”,-tha kreu i partisë ”Mundësia”. Ai akuzoi gjithashtu mazhorancën dhe kryeministrin Edi Rama për pengim të drejtësisë, duke deklaruar se me rastin e Ballukut “ndryshoi” qëndrimi i Partisë Socialiste ndaj SPAK-ut.
Nga ana tjetër, Rexhaj kërkoi që Balluku të konsiderohet e dyshuar dhe jo e dënuar, duke vënë në pikëpyetje lidhjen e saj me vilën. ”Në radhë të parë nuk është e korruptuar, por e dyshuar për korrupsion”,-tha Rexhaj. Rexhaj ngriti gjithashtu pyetjen se pse Balluku, sipas tij, nuk kishte shkuar në vilën në Green Coast përveç dy rasteve në kapacitet zyrtar.