Në hyrje të Durrësit, mes inerteve të mbetura pas shembjes së banesave, 14-vjeçari Alesio punon pa pushim. Si shumë të tjerë, ai nxjerr hekur nga rrënojat për ta shitur dhe për të siguruar të ardhura për familjen e tij
Pak metra më tutje, Dilaver Cani qëndron pa lëvizur përballë vendit ku deri pak ditë më parë ishte shtëpia e familjes së tij. Në vjeshtë e kishin rinovuar me leje të bashkisë, por sot aty kanë mbetur vetëm muret e rrëzuara, kujtimet e një jete dhe ndjenja e trajtimit të pabarabartë
Së bashku me ta, edhe familje të tjera kanë mbetur pa strehë pas vendimit për pastrimin e kanalit kullues pranë Urës së Dajlanit, një masë e marrë pas përmbytjeve të këtij fillimviti në Durrës
Familjet janë strehuar përkohësisht në Shtëpinë e Pushimit të Ministrisë së Brendshme në Plepa, por çdo ditë kthehen pranë rrënojave. Plot dhembje për humbjen e banesave dhe fatin e tyre, ata mundohen të punojnë dhe të sigurojnë jetesën, ndërsa presin një zgjidhje konkrete
Prej tri dekadash, këto familje jetonin buzë kanalit te Ura e Dajlanit. Sot, mes pasigurisë dhe pritjes, shpresa e tyre mbetet një përgjigje konkrete për strehim social