Shkarkimi i Gledis Nanos, Ngjela: Rama duhet të tregonte shkakun

Shkarkimin e Gledis Nanos nga posti i Drejtorit të Përgjithshëm të Policisë së Shtetit, avokati Spartak Ngjela, e shikon si një defekt të kryeministrit Edi Rama, pasi ai e emëroi në këtë post. Sipas tij Rama duhet t’i tregonte opinionit publik, shkakun dhe arsyen që çoi në shkarkimin e Gledis Nanos.

“Është defekt i kryeministrit, e shkarkoi kryeministri Drejtorin e Policisë dhe nuk i jep arsyen opinionit publik, shkakun. Nuk mund të lejohet, se e shkarkoi, nuk ka dorëheqje. Po të kishte dhënë dorëheqjen ky, do jepte shkakun për dorëheqje. Kryeministri nuk jep shkak, e di veten absolut si Enver Hoxha.

Këtu nuk po e kuptojmë dot. Nuk është ndonjë gjë e rëndë largimi i Drejtorit të Policisë, sepse këta janë në pushtet prej 9 vitesh. Këtu pyetet, si ka qenë kriminaliteti gjatë kohës së tij, në rënie apo në ngritje? Nuk flasin këta, janë memecë. Sa është përqindja e kriminalitetit gjatë kohës që Nano kishte drejtimin? Këtë nuk e dimë”, tha për ”Euronews Albania”.