Shpërthimi në ish-Bllok, humb jetën gruaja 43-vjeçare

43-vjeçarja Alma Pirra ka humbur jetën. Që nga data 15 korrik, ajo ndodhej në gjendje të rëndë për jetën në QSUT, në repartin e djegie-plastikës. Gruaja ishte pronare e argjendarisë në ish-bllok, në të cilën shpërtheu një bombol gazi. Veç saj të plagosur mbetën dhe tre persona të tjerë.

Sipas ekspertëve mendohet se shpërthimi ka ndodhur nga ngopja e bodrumit të argjendari me gaz.  Rrjedhja e gazit u provokua nga një shkëndijë elektrike, duke aktivizuar edhe shpërthimin e fuqishëm.

Bombolat ishin mbushura me gaz teknin, që njihet për fuqinë shkrirëse të metalit dhe propan, që merret me përpunimin e floririt.

Një nga shkeljet e vërejtura nga Inspektorati Shtetëror Teknik dhe Industrial është fakti se, bombolat e gazit ishin në bodrum dhe në ambient të mbyllur.

Ende nuk dihet nëse argjendaria ka qenë e pajisur me licencë për përpunimin e floririt dhe nëse, ISHTI kishte kryer kontrollin teknik periodik të biznesit që është në pronësi të shtetasit Sokol Pirra.