Shqipëria po plaket

Të dhënat demografike, emigrimi për arsye edukimi dhe profesionale, janë arsyet kryesore sipas analizës së Bankës Botërore që Shqipëria po plaket. Numri i popullsisë së Shqipërisë prej kohësh ka mbetur i njëjtë, 2.8 milionë banorë.

Në 2021, INSTAT llogariti mbi 3,000 vdekje më shumë sesa lindje. Ky ishte kulmimi i një rënieje të vazhdueshme të lindshmërisë në Shqipëri. Emigrimi i shqiptarëve për të gjetur një punë më të mirë vijon, duke sjellë rënien e numrit të qytetarëve në moshë pune.

Qeveria ”Rama 3” shpenzon më pak para për edukimin publik, se çdo vend tjetër në rajon dhe Evropë. Banka Botërore i sugjeron investim në edukimin publik, reformimin e sistemit universitar, si dhe krijimin e kushteve për nxitjen e kthimit në Shqipëri të të diplomuarve në universitete të huaja, duke krijuar vende pune që kërkojnë aftësi të larta profesionale.