Shqipëria rikonfirmon angazhimin në NATO, ministri Nufi takohet me zv/sekretaren Šekerinska

Ditën e sotme Ministri i Mbrojtjes, z. Ermal Nufi zhvilloi një takim gjithashtu me Zëvendëssekretaren e Përgjithshme të NATO-s, Radmila Šekerinska. Në fokus të diskutimeve ishin siguria në Ballkanin Perëndimor, angazhimi i Shqipërisë në Aleancë dhe përgatitjet për samitet e ardhshme të NATO-s. Përgjatë takimit, Ministri Nufi ri-konfirmoi vendosmërinë e Shqipërisë për të mbetur një faktor konstruktiv në Evropën Juglindore, duke mbështetur paqen, stabilitetin dhe bashkëpunimin rajonal.

Në bisedë u nënvizua gjithashtu angazhimi i palëkundur i Shqipërisë ndaj NATO-s dhe vlerave euroatlantike, si dhe zbatimi i vendimeve të Samitit të Hagës për rritjen e investimeve në mbrojtje. Ministri Nufi vuri në dukje se, rritja e buxhetit të mbrojtjes do t’i japë Shqipërisë më shumë fleksibilitet për të përmbushur detyrimet dhe kërkesat e Aleancës.

Një tjetër çështje e trajtuar ishte modernizimi i kapaciteteve ushtarake dhe rigjallërimi i industrisë vendase të mbrojtjes, për të cilën Ministri tha se, ka pasur zhvillime inkurajuese dhe interes në rritje nga partnerët ndërkombëtarë të industrisë së mbrojtjes. Të dy bashkëbiseduesit diskutuan edhe për përgatitjet për Samitin e NATO-s në Ankara më 7-8 korrik, ndërsa Ministri Nufi theksoi rëndësinë e punës për organizimin e Samitit historik të NATO-s në Tiranë në vitin 2027-të.

Ministri Nufi nënvizoi gjithashtu se Shqipëria mbetet e angazhuar për forcimin e kapaciteteve të mbrojtjes kibernetike në bashkëpunim të ngushtë me NATO-n dhe aleatët, si pjesë e rritjes së qëndrueshmërisë dhe sigurisë kombëtare.