Shqipëria vijon negociatat për Kapitullin 27, ministri Jaupaj në Bruksel: Objektivi ynë është afrimi me standardet europiane

Një vit nga hapja e negociatave për Kapitullin 27, që lidhet me mjedisin dhe ndryshimet klimatike, Shqipëria vijon procesin e përafrimit me standardet e Bashkimit Evropian. Ministri i Mjedisit, Sofjan Jaupaj bëri me dije se gjatë qëndrimit në Bruksel ka zhvilluar një takim me Komisioneren Evropiane për Mjedisin, Jessika Roswall, ku ka prezantuar punën e realizuar gjatë vitit të parë të negociatave, si dhe reformat dhe investimet e ndërmarra në këtë fushë.

Sipas Jaupajt, në zbatimin e angazhimeve për Kapitullin 27 janë përfshirë 29 institucione, të cilat kontribuojnë në përmbushjen e kërkesave dhe standardeve europiane për mjedisin. ”Prezantova punën e realizuar gjatë këtij viti nga ekipi ynë i përbashkët, me përfshirjen e 29 institucioneve që kontribuojnë në këtë kapitull, si dhe reformat, investimet dhe hapat që kemi përpara për të përmbushur angazhimet tona europiane”, deklaroi ministri.

Jaupaj vlerësoi gjithashtu punën e stafit të Ministrisë së Mjedisit dhe institucioneve në varësi të saj, duke e cilësuar kontributin e tyre si thelbësor në ecurinë e procesit. Ministri theksoi se prioritetet për periudhën në vijim lidhen me rritjen e rezultateve konkrete, forcimin e standardeve mjedisore dhe vijimin e përafrimit të Shqipërisë me Bashkimin Evropian. “Objektivi ynë është i qartë: më shumë rezultate konkrete, standarde më të larta mjedisore dhe një Shqipëri gjithnjë e më pranë Bashkimit Evropian”, u shpreh Jaupaj.

Postimi i plotë

Një vit nga hapja e negociatave për Kapitullin 27-Mjedisi dhe Ndryshimet Klimatike, Shqipëria vijon me vendosmëri rrugën drejt standardeve europiane për mjedisin.

Në Bruksel, gjatë takimit me Komisioneren Evropiane për Mjedisin, Jessika Roswall, prezantova punën e realizuar gjatë këtij viti nga ekipi ynë i përbashkët, me përfshirjen e 29 institucioneve që kontribuojnë në këtë kapitull, si dhe reformat, investimet dhe hapat që kemi përpara për të përmbushur angazhimet tona europiane.

Një falënderim i veçantë për të gjithë ekipin e Ministrisë së Mjedisit dhe institucionet e varësisë, për punën e jashtëzakonshme, përkushtimin dhe profesionalizmin që tregojnë çdo ditë. Çdo rezultat i arritur është fryt i një pune të madhe të përbashkët.

Objektivi ynë është i qartë: më shumë rezultate konkrete, standarde më të larta mjedisore dhe një Shqipëri gjithnjë e më pranë Bashkimit Evropian.