Shqiptari në Gjermani “kryelartë” para gjykatës, pranon akuzat për terrorizëm

Në Düsseldorf është duke vazhduar procesi gjyqësor për grupin e salafistëve, të cilët dy vite e gjysmë më parë ( 10 dhjetor 2012) në stacionin e trenit në Bon deponuan një çantë me eksploziv. Ndër ta u arrestua  edhe shtetasi nga Shqipëria, Enea B.

Ditën e djeshme, Enea B refuzoi të heqë kapelën e tij nga koka duke përvetësuar edhe 7 ditë burg për mosrespektimin e fuqisë së shtetit, përkatësisht prokurorit në gjykatë.

Deri më tani Enea ka mbledhur afër 250 ditë burg, gjë që këto ditë nuk do i bashkëngjiten përfundimit të procesit gjyqësor, por që këto ditë ai duhet t’i mbaj në veçanti, pa marrë parasysh se çfarë do sjell procesi për terrorizëm.

Një shtetas gjerman i konvertuar si dhe dy shtetas turq, para gjykatës, janë kokulur dhe në një mënyrë pendohen për tentativën e terrorizmit, përderisa shtetasi nga Shqipëria vazhdon të jetë kokëlartë dhe refuzon tërësisht gjykatën. Edhe gjatë shërbimit të paraburgimit, ai ka rënë në konflikt me gardianët e burgut, duke kërcënuar ata me jetë.

“Nëse më pengon përderisa bëj lutjen, atëherë jam i detyruar të të godas dhe ndoshta edhe të shkëputi nga jeta”. Deri më tani, ekspertët e kriminalistikës kanë sjellë faktet mbi shtetasin nga Shqipëria duke shfaqur gjykatës përgjimet telefonike si dhe përgjimet e sistemit GPS për veturë. Përderisa 3 personat tjerë në pikëtakim udhëtonin 10-20 herë, Enea B kishte udhëtuar 28 herë.

Ky pikëtakim shërbeu për planifikimin e një sulmi terrorist mbi kryesinë e organizatës "Pro-NRË", pasi që kjo është e njohur si një organizatë antisalafiste.

Ekspertët e kriminalistikës kanë zbuluar se 46 vjeçari Enea B. kishte shërbyer një njësiti special të policisë në Shqipëri, më pastaj kishte arritur në Gjermani duke kërkuar azil politik.

Me ardhjen e tij në Gjermani, ai u konvertua në Islam dhe filloj të ndryshohet tërësisht aq sa edhe u largua nga banesa ku ishte, pasi atë e pengonin fqinjët të cilët zienin gjellë me mish derri. Edhe bashkëshortja e tij u largua nga ai, pasi ajo refuzoj të vishej në burka.

Familjarët e tij në Shqipëri përmes një telefonate kanë informuar se në familjen e tyre asnjëherë nuk ka pasur ekstremizëm dhe se kjo familje edhe pse vet janë katolikë, fqinjët e tyre janë myslimanë dhe pranojnë njëri tjetrin sikur të ishin vëllezër, pa dallime fetare.

Një bashkëfshatar i tij (nga Shqipëria) përshkruan atë si një njeri të mirë dhe me kulturë, por që nga radikalizmi i tij, ai është larguar nga miqësia që kishin më parë.- “Edhe pse disa herë tentova të ta telefonoj, ai u distancua nga unë tërësisht". Gjykata ka marrë parasysh se Enea është një njeri tejet inteligjent dhe i rrezikshëm për opinionin. Pasi Gjykata deri më tani nuk arriti të zbuloj ndonjë person tjetër të cilin do e njohur si kokë kryesore e këtij akti terrorist, Enea B merr përsipër këtë. Procesi gjyqësor do vazhdoj edhe me tutje ku supozohet se mund të zgjasë deri në vitin tjetër. Proçesi filloi nga shtatori i vitit të kaluar.

Ditën e parë të gjykimit si dhe disa herë tjera, Enea B me hyrjen e tij në salle kishte bërtitur ‘Allhu Akbar’. Ai edhe sot refuzon të bashkëpunoj me gjykatën, duke refuzuar edhe përkthyesin nga gjermanishtja në shqip.