Sinagoga e Sarandës drejt transformimit, ministri Gonxhja: Restaurim, ndriçim modern dhe infrastrukturë për vizitorët

Qyteti i Sarandës do të pasurojë ofertën turistike me restaurimin e një prej monumenteve më të rralla të tij. Bëhet fjalë për Sinagogën historike të qytetit e cila është një nga sitet më të veçanta arkeologjike që do t’i nënshtrohet një ndërhyrje gjithëpërfshirëse dhe një investimi të plotë.

Lajmin e konfirmoi Ministri i Turizmit, Blendi Gonxhja, në rrjete sociale, ku edhe ndau pamje nga Sinagoga e Sarandës. Gonxhja informon se ndërhyrja do të jetë gjithëpërfshirëse dhe do të përfshijë jo vetëm restaurim dhe konservim të monumentit, por edhe mbrojtje të mozaikëve, vendosje të një sistemi modern ndriçimi, përmirësim të infrastrukturës për vizitorët dhe të zyrës së informacionit.

“Në Sinagogën historike shumë shpejt do të nisë një investim gjithëpërfshirës, që synon restaurimin dhe konservimin e monumentit, mbrojtjen e mozaikëve, sistemin modern të ndriçimit, modernizimin e zyrës së informacionit dhe infrastrukturës së nevojshme për vizitorët. Synimi është një ndërhyrje cilësore që do t’i rikthejë shkëlqimin e munguar, që të jetë i aksesueshëm gjatë gjithë ditës dhe natës, si dhe për ta kthyer sa më shpejt këtë sit në një pikë dinjitoze vizitueshmërie për qyteti”,-tha Gonxhja.

Ky projekt vjen si rezultat i një bashkëpunimi mes institucioneve, ku përfshihen Bashkia, Ministria e Kulturës, Turizmit dhe Sportit, si dhe Fondacioni Besa, që do të japë mbështetjen e tij. “Ky fondacion, i lidhur ngushtë me historinë e besës shqiptare dhe mbrojtjen që populli ynë u bëri hebrenjve gjatë Luftës së Dytë Botërore, sjell një kontribut të vyer edhe për këtë monument me simbolikë të veçantë”.