Sinjal që Martinaj është gjallë? RENEA ”rrethon” Shijakun

Një ditë pas datëlindjes së ”mbretit”, RENEA ”rrethon” zonën e Shijakut. Ende nuk dihet nëse është sinjal që Ervis Martinaj të jetë vrarë apo fshehur në zonën e Shijakut. Momenti i fundit që ai është parë i gjallë ka qenë pikërisht në Shijak.

Fokusi i kontrolleve të kërkuara nga Policia e Durrësit, ishin personat që vijojnë të jenë në kërkim në kuadër të operacionit “Porositësi”, përmes së cilit u arrestuan 15 persona, përfshirë vëllezërit Gentjan e Indrit Beqiraj që rrëfyen mbi disa ngjarje të pazbardhura.

Martinaj i konsideruar si bosi i lojërave, fati i tij mbetet akoma mister, ndërsa po aq mister mbeten rezultatet e policisë në këtë aksion të kryer.

Ai rezulton i zhdukur që prej 8 gushtit të këtij viti. Në harkun kohor të dy muajve, policia ka kryer disa kontrolle në kërkim të tij në qytete të ndryshme, operacione të cilat janë mbajtur diskrete. Policia e ka një përgjigje për fatin e 40-vjeçarit, por është në kërkim të provave për t’ia servirur edhe opinionit publik.