”Sistemi i BE ka dështuar”, Braçe për radhët e shqiptarëve në kufirin Kroaci-Mal i Zi: 7 orë pritje për skanimin e fytyrës

Deputeti i PS-së, Erion Braçe, ka reaguar për pritjet e gjata të emigrantëve shqiptarë në kufirin mes Kroacisë dhe Malit të Zi, duke kritikuar procedurat e skanimit të fytyrës gjatë daljes nga Bashkimi Evropian.

Sipas Braçes, qindra emigrantë shqiptarë që po kthehen me rrugë tokësore drejt Shqipërisë po përballen me pritje që zgjasin deri në 6–7 orë në kufi, për shkak të skanimit të fytyrës.

Ai thotë se vetëm gjatë një dite ka marrë 12 mesazhe nga shqiptarë me banim dhe punë në Evropën Perëndimore e Qendrore, të cilët i kanë raportuar vonesat në pikën kufitare.

Postimi i plotë

Qindra emigrantë shqiptarë po vuajnë për të dalë nga Kroacia, për të hyrë në Mal të Zi dhe për të mbërritur në Shqipëri! Vetëm dje kam marrë këtu dhe në telefon 12 mesazhe nga shqiptarë me banim dhe punë në Evropën Perëndimore e Qendrore, të cilët, duke udhëtuar në rrugë tokësore, po kthehen në Shqipëri.

6 orë, 7 orë pritje në radhë në kufirin mes Kroacisë dhe Malit të Zi, në pritje të skanimit të fytyrës. Kjo nuk është siguri! Është radhë, ngadalësim, vonesë, kufizim i lirisë së lëvizjes, bezdi, mërzi dhe një torturë në këto temperatura!

E kuptoj sistemin e ri të Bashkimit Evropian, me fokus sigurinë në lëvizjen e njerëzve, por ai ka dështuar. Thjesht ndalon, ngadalëson, vonon dhe nuk sjell më shumë siguri. Në fund, e kuptoj skanimin në hyrje në BE, por në dalje çfarë kuptimi ka?