Situatë alarmante në Pukë, evakuohen banorët në Pepaj: Të ndërhyhet nga ajri me urgjencë!

Situata në fshatin Gojan të Pukës është përshkallëzuar, pasi një zjarr i fuqishëm ka dalë jashtë kontrollit dhe po kërcënon banesat dhe jetën e banorëve në lagjen Pepaj.

Përballë përhapjes së flakëve, autoritetet kanë nisur evakuimin e banorëve, të cilët janë zhvendosur përkohësisht në zonën pranë shkollës së Gojanit të Madh. Në përpjekje për të shpëtuar pasuritë e tyre, banorët kanë nxjerrë jashtë banesave orendi dhe sende të ndryshme.

Në terrenin e vështirë po punojnë forcat zjarrfikëse dhe efektivë të Forcave të Armatosura. Ndërhyrja është komplikuar edhe më tej nga shpërthimet e njëpasnjëshme të municioneve të vjetra ushtarake në zonën e përfshirë nga zjarri.

Të paktën pesë banesa në lagjen Pepaj janë aktualisht nën kërcënimin e drejtpërdrejtë të flakëve, ndërsa një pjesë e zonës është mbuluar nga tymi i dendur. Sipas raportimeve paraprake, dyshohet se një prej banesave mund të jetë përfshirë tashmë nga zjarri.

Banorët kërkojnë ndërhyrje të menjëhershme nga ajri, me shpresën se flakët do të vihen nën kontroll dhe rreziku për banesat dhe jetën e njerëzve do të minimizohet.