Një situatë e rënduar nga zjarret është shënuar gjatë pasdites në disa qarqe të vendit, ndërsa era e fortë ka favorizuar përhapjen e flakëve. Një prej vatrave më problematike është regjistruar në zonën e Priskës së Madhe, pranë fshatit Daias në Tiranë.
Zjarri është përhapur me shpejtësi në një zonë me bimësi dhe shkurre të dendura, ndërsa tymi ka mbuluar territorin përreth. Në terren ndodhen forcat zjarrfikëse, të cilat po punojnë për izolimin e flakëve, ndërsa në operacion është angazhuar edhe një helikopter i Forcës Ajrore. Deri tani nuk raportohet rrezik për banesat.
Situatë më shqetësuese paraqitet në fshatin Abazë të Krujës, ku për shkak të avancimit të flakëve dhe erës së fortë është urdhëruar evakuimi i banorëve. Dhjetëra zjarrfikës dhe helikopterë janë angazhuar në përpjekjet për shuarjen e zjarrit dhe mbrojtjen e banesave.
Zjarri vijon prej disa ditësh edhe në Lurë të Dibrës, ku janë përfshirë sipërfaqe të konsiderueshme. Forcat e emergjencave, së bashku me banorët e zonës, po punojnë për neutralizimin e vatrave dhe frenimin e përhapjes së flakëve drejt zonave të banuara.
Deri në orën 17:00, në vend janë evidentuar 10 vatra aktive zjarri në qarqet Tiranë, Fier, Durrës, Gjirokastër, Dibër dhe Korçë. Forcat operacionale vijojnë punën për vënien nën kontroll të situatës.