”S’ka më kohë për karamele”/ Deputeti i PS, Malaj: Moment i rëndësishëm për integrimin

Deputeti i PS-së, Erion Malaj e cilëson momentin aktual si të rëndësishëm për integrimin, por vë në dukje se ka ende shumë për t’u përmirësuar në disa fusha dhe sektorë të caktuar.

”Sigurisht që është moment i rëndësishëm, as nuk jemi të surprizuar, por as nuk jemi të hutuar nga kjo gjë, sepse kemi punuar që të gjithë bashkë që të arrihet ky moment. Nuk është sfidë e vogël, ne e dimë, se ashtu siç kemi bërë arritjet tona, kemi edhe shumë sfida dhe çështje të tjera për të cilat duhet punuar fort. Kemi vend shumë për të përmirësuar disa fusha dhe sektorë të caktuar ku puna duhet të jetë edhe më e madhe për të arritur objektivin primar, që është integrimi i plotë në familjen e madhe europiane”,-tha në ”A2cnn”. I pyetur nëse propozimi i kancelarit Merz ishte një sinjal i mirë, apo karamele, Malaj tha se në këtë moment nuk mund të flasim më për “karamele dhe mesazhe të koduara”.

“Në këtë moment që flasim s’ka më kohë për karamele dhe mesazhe të koduara. Interpretimi nga krahët politik kanë qenë të kundërta, ne kemi një qëndrim, opozita një qëndrim tjetër. Gjermania ka qenë dhe do të jetë krah nesh në këtë fazë të rëndësishme për integrimin, na i kanë shprehur në nivelet më të larta në Bundestag dhe çdo vizitë zyrtare atje. Patjetër që do jetë proces me meritë dhe jemi besimplotë se mund të arrijmë afatet, edhe në formatin siç është shprehur kancelari”, vijoi ai.