Skandali i AKSHI-t, Gent Progni nga protesta: Shteti shqiptar ka shitur të dhënat tona për kriminelë nëpër botë

Aktivisti Gent Progni, gjatë fjalës së tij në protestën e 115-të përballë Kryeministrisë, u ndal te hetimet që lidhen me AKSHI-n, duke deklaruar se skandali, sipas tij, është shumë më i gjerë nga sa është bërë publik deri tani. Progni tha se e kishte denoncuar këtë çështje prej disa vitesh dhe akuzoi institucionet se nuk e kanë hetuar në thellësi.

“Përpara 4 vitesh unë kam denoncuar aferën e AKSHI-t. Ende nuk është hetuar në thellësi”, deklaroi ai. Për të nëse hetimi do të shtrihet në të gjitha aspektet e çështjes, mund të zbardhen të dhëna që ai i konsideron ndër skandalet më të mëdha në Europë.

“Shteti ka printuar pasaporta false, shteti ynë ka shitur të dhënat tona për kriminelë nëpër botë, shteti ynë ka përdorur të dhënat tona për trafik droge nëpër botë dhe, nëse hetohet si duhet, është nga skandalet më të mëdha në Europë”, u shpreh Progni.

Duke iu drejtuar mediave, aktivisti ngriti gjithashtu pyetje mbi personat që ai i lidhi me çështjen, duke përmendur Ergys Agaçin dhe Ermal Beqirajn. “Desha t’ju them mediave se ku e keni sot Ergys Agaçin, ku e keni Ermal Beqirajn? Sepse janë një grup i strukturuar kriminal, që janë munduar ta fshehin atë aferë, që sot po del hapur sesa e tmerrshme ka qenë”, tha Progni.