Drejtori i Përgjithshëm i Policisë së Shtetit, Skënder Hita, ka dalë në një konferencë për mediat për të reaguar lidhur me një veprimtari të dyshuar të koordinuar në hapësirën kibernetike kundër bizneseve me komente negative.
Në fjalën e tij Hita deklaroi se dyshohet që mbi 10 mijë llogari në rrjetet sociale po përdoren për të sulmuar aktivitetet e bizneseve në sektorin e turizmit.
“Bëhet fjalë për një shqetësim serioz lidhur me një veprimtari të dyshuar të koordinuar në hapësirën kibernetike, e cila rrezikon të dëmtojë jo vetëm bizneset, por edhe imazhin e Shqipërisë si një vend i sigurt dhe mikpritës.
Strukturat tona kanë evidentuar një aktivitet të dyshuar të koordinuar në platformat online, që konsiston në publikimin masiv të komenteve dhe vlerësimeve (review) negative ndaj bizneseve që ushtrojnë aktivitet në sektorin e turizmit.
Administrimi i kallëzimeve dhe të dhënat e mbledhura japin indicie për ekzistencën e një rrjeti llogarish të koordinuara. Brenda një periudhe të shkurtër, këto llogari kanë publikuar në mënyrë masive komente negative, me qëllim dëmtimin e reputacionit të bizneseve shqiptare.
Deri më tani janë evidentuar mbi 10 mijë llogari me modele aktiviteti të dyshimtë. Mes tyre ka edhe llogari me profile që, në pamje të parë, duken të rregullta, por që janë identifikuar si pjesë e këtij aktiviteti.
Janë konstatuar raste kur e njëjta llogari ka publikuar vlerësime negative për biznese në qytete të ndryshme, si Tirana, Durrësi, Elbasani, Shkodra, Korça, Vlora dhe Saranda.
Nëse provohet se ky aktivitet është i qëllimshëm dhe i koordinuar, ai cenon konkurrencën e ndershme, besimin e konsumatorëve dhe perceptimin e Shqipërisë si një destinacion i sigurt turistik.
Çdo përpjekje për të dëmtuar interesat ekonomike të vendit do të trajtohet me prioritet maksimal nga strukturat përgjegjëse.
U bëjmë thirrje të gjithë qytetarëve dhe bizneseve që kanë konstatuar raste të ngjashme të paraqesin kallëzim pranë organeve të Policisë së Shtetit”, tha Hita.