Snajperët qëllojnë 11 policë në Dallas

Katër policë u vranë dhe shtatë të tjerë u plagosën në rrugët e Dallasit. Ekzekutimet u kryen nga snajpera të vendosur në pika të ndryshme të qytetit, për të cilat nuk dihet ende asgjë. Në Dallas ka pasur të shkëmbim zjarri, por duket se vrasjet e policëve janë pasojë e dy ngjarjeve të rënda, ku janë vrarë dy persona me ngjyrë.

Sulmet ndaj policisë nisën pas protestave, që në të shumtën e rasteve ishte paqësore.

Protestuesit dolën në rrugë kundër dy vrasjeve nga policia. Në njërin rast u vra Philando Castile, afër vendit St. Paul në Minesotë, më 6 korrik. E dashura e tij, Diamond Reynolds, në rrjetet sociale postoi videon ku shihet Castile duke vdekur në rrëke të gjakut.

Më 5 korrik, një person me ngjyrë, Alton Sterling, është vrarë gjatë një grindjeje me dy policë të bardhë në Baton Rouge në Luizianë.

Presidenti amerikan, Barack Obama, këto vrasje i ka cilësuar si tragjike.

“Të gjithë ne si amerikanë duhet të jemi të shqetësuar nga këto të shtëna, pasi ato nuk janë incidente të izoluara. Ato janë shenjë e një kompleksi të gjërë të pabarazive, që ekzistojnë në sistemin tonë gjyqësor penal”, tha Barack Obama.