Sot nisin provimet e Maturës Shtetërore. Po çfarë ndodh me nxënësit që janë me Covid

Rreth 34 mijë maturantë i nënshtrohen sot provimit të parë të gjuhës së huaj. Testi do të zhvillohet në 208 qendra provimesh.

Më pas në 7 qershor vijohet me gjuhën shqipe dhe letërsinë, matematika në 11 qershor dhe e përmbyllin me testin e lëndës me zgjedhje në 15 qershor.

Ndërkohë që maturantët mbarojnë provimet, një ditë më pas nis testimi për 31 mijë nxënësit e klasave të 9-ta. 3 provimet e lirimit, gjuha shqipe, matematika dhe gjuha e huaj do të zhvillohen nga 16 qershori deri në 25 qershor.

Testet do të zgjasin dy orë e 30 min për të dyja grupet, teksa nisin në orën 10:00. Edhe këtë vit, veç rregullores së maturës, nxënësit duhet të zbatojnë masat anti Covid, distancën dhe mbajtjen e maskave gjatë kohës së provimit.

Mësuesit dhe nxënësit e infektuar nuk do të jenë pjesë e testimeve, në mesin e 34 mijë nxënësve e thuajse po aq mësuesve të përfshirë në administrim mësohet të mos jetë asnjë me Covid-19, sipas burimeve në Ministri. Pjesë e ekipit administrues në kate shkollash apo edhe përgjegjës mësohet se do të jenë edhe mësuesit praktikantë, të cilët ankohen se pas një viti të lodhshëm e sfidues edhe për ta, duke zëvendësuar çdo mësues që mungonte, tanimë iu është dhënë një përgjegjësi e madhe jo vetëm pa të drejtë pagese, por edhe pa transport.