Sot protesta e PD, nisën autobusët e parë nga rrethet, policia rrethon Parlamentin

Tiranë-Partia Demokratike do të zbresë sot në shesh për të kërkuar dorëheqjen e kreut të Kuvendit Ilir Meta pas akuzave se ai ka porosituar vrasjen e dy deputetëve.

Protesta masive e thirrur nga demokratët do të nisë rreth orës 11:00 nga sheshi “Skëndërbej”.

Që në orët e para të mëngjesit nga policia e shtetit ka nisur focimi i masave të sigurisë përreth Parlamentit, pasi sot është edhe seanca plenare. Efektivë të FNSH-së kanë rrethuar godinën.

Policia e Shtetit bëri publike dje planin e masave për mbarëvajtjen e protestës, ku përfshiheshin bllokimet e disa akseve rrugore, sikundër dhe kontrolle të shumta personash dhe mjedisesh, me qëllim identifikimin dhe kapjen e personave që mund të lëvizin me armë apo sende të tjera të kundraligjshme.

Ndërkohë nga rrethet janë nisur autobusët e parë me qytetarë që do marrin pjesë në protestë. Janë të shumtë qytetarët që janë nisur dhe me makina personale.

Protesta është thirrur nga PD edhe për të nxitur dekriminalizmin e Kuvendit deri në largimin e Metës.

Por arsyet pse ftohen shqiptarët të dalin sot në shesh nuk lidhen vetëm me dekriminalizimin.

Për demokratët, prostesta bëhet edhe kundër kriminalitetit e atentateve që kanë cënuar sigurinë e jetës, si edhe varfërinë e faturimet abuzive, për të cilat opozita ka ngritur shqetësimin se po krijon drama sociale.

Protesta e sotme pritet të jetë e dyta më e madhe e opozitës, pas asaj të 22 nentorit, e cilësuar si një protestë ekonomike, kundër varfërisë së shqiptarëve.

 Ora 08:22 Autobusë me mbështetës nisen edhe nga Fieri dhe Pogradeci

Edhe nga Fieri dhe Pogradeci janë nisur autobusë me mbështetës të PD. Kreu i PD-së Fier, Luan Baçi tha se nga ky qytet janë nisur disa autobusë, pa përcaktuar numër të tyre.

“ Kemi inforfmacione që policia do të na pengojë, ka ngritur postbllok tek Vija e Ngjalës” tha Baçi.

Ndërsa kreu i demokratëve të Pogradecit Preza tha se 400 mbështetës nga Pogradeci janë nisur drejt kryeqytetit.

08:17 Nisen 4 autobusë me mbështetës të PD-së nga Korça

Nga qyteti juglindor i Korçës janë nisur drejt Tiranës 4 autobusë me mbështetës të PD-së që do ti bashkohen protestës. Kreu i PD-së Korçë Mane tha se do të jenë 3 mijë mbështetës korçarë që do zbarkojnë në kryeqytet.

 Ora 08:01 Nisen autobusët e parë me qytetarë nga rrethet

Nga Shkodra dhe Kukësi janë nisur autobusët e parë me mbështetës të opozitës, që do ti bashkohen protestës së thirrur në orën 11:00 në sheshin “Skëndërbej” në Tiranë.

5 autobusë me qytetarë janë nisur nga Shkodra, ndërsa në Kukës kreu i PD-së tha se protesta e sotme është kundër keqqeverisjes.

“Protesta jonë  është paqësore, kundër keqqeverisjes. Është një protestë ndaj vrasjeve të porositura dhe kundër varfërisë”.