Analisti Nexhmedin Spahiu tha se shpresa e vetme për katër ish-krerët e UÇK-së të dënuar nga Dhomat e Specializuara të Kosovës në Hagë mbetet procesi i Apelit dhe më pas, nëse është e nevojshme, Gjykata Supreme pranë Dhomave të Specializuara. Ai tha se vëmendja duhet të përqendrohet te rruga juridike që mund të ndjekin të dënuarit.
“Shpresa e vetme e të dënuarve në Hagë mbetet Gjykata e Apelit dhe më pas Gjykata Supreme pranë Gjykatës Speciale. Besoj se e gjithë beteja duhet të përqendrohet në këtë drejtim, lidhur me fatin e katër ish-krerëve të UÇK-së”, tha ai.
Spahiu tha se vetë Gjykata Speciale ka theksuar në vendimin e saj se nuk po gjykon luftën e UÇK-së për çlirimin e Kosovës dhe se akuzat për krime kundër njerëzimit janë rrëzuar.
“Gjykata ka thënë se këtu nuk dënohet gjykimi i UÇK-së për çlirimin e Kosovës dhe është liruar nga akuzat për krime kundër njerëzimit. Protestat në Kosovë po shihen si ndërhyrje në drejtësi. Më e rëndësishmja është që gjykata ka hedhur poshtë akuzat për krimet kundër njerëzimit dhe se këtu nuk gjykohet qëllimi i UÇK-së për pavarësi”, tha ai.
