Spiun me rusët dhe pse bashkë? Konsullja e Ukrainës: Shtetasi ynë ishte vetëm shofer

Rusët Mikhail Zorin dhe Svetlana Timovoefa, si dhe shtetasi ukrainas Fadir Aplativ, do të mbahen nën masat e sigurisë “arrest me burg”, deri në përfundim të hetimeve të nisura ndaj tyre pas arrestimit pranë ambienteve të ish-uzinës së prodhimit të municioneve në Çekin të Gramshit.

Mikhail Zorin ka kundërshtuar dy efektivët e forcave të armatosura që ruanin objektin ku Zorin ishte futur në mënyrë të paligjshme për të fotografuar, duke u hedhur edhe spraj neuroparalizues.

Gjatë zhvillimit të seancës, vetë të arrestuarit dhe avokatët e tyre kërkuan masa më të buta sigurimi, ndërsa në sallën e Gjykatës së Elbasanit ka qenë e pranishme edhe konsullja e Ukrainës në vendin tonë, Svetllana Bogdanova, e cila u sigurua se ndaj shtetasit ukrainas, si i përfshirë në këtë hetim, Fadir Aplativ, ishin respektuar të drejtat e parashikuara në ligj, ndërsa u shpreh se ai ka qenë vetëm shofer i dy shtetasve rusë.

“Besoj se qytetari ynë është i pafajshëm, ka qenë vetëm një udhëtar. Jam këtu për të parë nëse i janë ofruar kushtet e duhura për mbrojtje. Detyra ime është të mbroj të drejtat e qytetarit tim. Ai duhet të përfaqësohet me avokat, duhet të jetë në kushte të mira dhe duket se këto janë garantuar”, tha Bogdanova.