Statuja e Stalinit në vilën e ”Mehmet Shehut”, Nurellari: E turpshme. Kjo ndodh në fund të rrugës që quhet ”Ukraina e Lirë”

Strehimi i statujave të Leninit dhe Stalinit në vilën qeveritare, dikur e njohur si ”vila e Mehmet Shehut”, ka krijuar jehonë dhe debate në opinionin publik. Sipas analistit Andri Nurellari, vendosja është veprim i shëmtuar.

“Krimet çnjerëzore të komunizmit, dhe fakti që Shqipëria është një nga viktimat kryesore dhe plagët janë ende të hapura, e bëjnë sipas meje krejt pavend të bëhen instalacione dhe show të këtij tipi. Akoma më fyese, kur kjo ndodh në ndërtesën e një sadisti i përmasave të jashtëzakonshme si Mehmet Shehu”.

Për të ka edhe një paradoks tjetër, pasi statujat janë në një rrugë që quhet ”Ukraina e Lirë”. ”Kjo ndodh në fund të rrugës që quhet “Ukraina e lirë”, që tregon një hipokrizi për të bërë lajme, dhe nga ana tjetër për t’i bërë qejfin nostalgjikëve, ringrihen këto simbole të urryera”.