Stresi flet nga arratia: Nuk dorëzohem, jam jashtë kufijve tani

Ndonëse policia ka 3 ditë që e kërkon dhe nuk e gjen Arkimed Lushaj ka gjetur kohë të flasë për gazetarët. Në një prononcim të shkurtër për të përditshmen “Panorama” ai thotë se është ndaluar nga policia dhe i është bërë testi i alkoolit, i cili ra rezultuar në rregull. “Testi doli në rregull. Plotësuam edhe formularin. Më pas më thanë që kisha qenë i dehur. U habita” – thotë Stresi. Ai pranon se lejen e drejtimit nuk e ka pasur me vete. Lushaj u ka treguar gazetarëve se u arratis për shkak se po e çonin në dhomën e izolimit. “Do të më mbanin 3 ditë në qelitë e paraburgimit pa raport shoqërimi derisa të dilja në gjyq. Kjo ishte e padrejtë për mua, kështu që zgjodha të arratisesha. Më besoni, më dhimsen ata policë që u arrestuan për mua, shpresoj që drejtësia të vendoset edhe për ta dhe të kthehen në vendin e punës” – shton ai.  Stresi thotë se nuk ka ndërmend të dorëzohet ndërsa nënvizon se familja e tij do të merret me procedurat ligjore dhe se për momentin është jashtë shtetit në një vend të sigurt.