Stuhi e befasishme në Elbasan, breshëri dhe reshjet paralizojnë qarkullimin

Një stuhi e fuqishme ka goditur qytetin e Elbasanit dhe një pjesë të madhe të qarkut, duke sjellë reshje të dendura shiu, breshër dhe erëra të forta që ndryshuan brenda pak minutash situatën atmosferike.

Rreth orës 14:50 të kësaj të premteje, qielli u errësua dhe reshjet e rrëmbyeshme përfshinë qytetin, duke shkaktuar përmbytje në disa akse rrugore dhe vështirësi të mëdha në qarkullimin e automjeteve. Drejtuesit e mjeteve u detyruan të ulin ndjeshëm shpejtësinë për shkak të mungesës së dukshmërisë dhe pranisë së ujit në rrugë.

Edhe këmbësorët u përballën me vështirësi, pasi shiu intensiv dhe breshëri e bënë thuajse të pamundur lëvizjen në disa zona të qytetit. Erërat e forta kanë rritur rrezikun në ambiente të hapura, ndërsa moti i keq ka ndikuar në ritmin normal të jetës së përditshme. Pavarësisht kushteve ekstreme, deri më tani nuk raportohen persona të lënduar.