Stuhia përmbyt rrugë në Elbasan, kryebashkiaku Llatja inspekton nga afër zonat me probleme

Ashtu siç ishte paralajmëruar nga meteorologët dhe specialistët e emergjencave civile, një stuhi e fortë përfshiu disa qytete të vendit.

Në Elbasan reshjet e dendura kanë zgjatur për rreth 40 minuta, duke krijuar një shtresë të bardhë mbi rrugë dhe duke vështirësuar qarkullimin e automjeteve dhe lëvizjen e këmbësorëve.

Emergjencat raportojnë 40 mm shi e breshër për 38 minuta.

Disa bodrume u përfshinë nga uji ndërsa menjëherë ndërhynë ekipet zjarrfikëse. Po ashtu në qytet disa pemë u rrëzuan pa shkaktuar dëme.

Pas stuhisë me reshje të dendura shiu që goditi Elbasanin, kryetari i Bashkisë, Gledjan Llatja, ka dalë vetë në terren për të ndjekur nga afër situatën. Ndërkohë, ekipet e Bashkisë po punojnë në rrugët ku ka prani uji, si edhe në zonat e tjera ku stuhia ka shkaktuar probleme.

Sipas raportimeve stuhia përfshiu fshatrat përreth, por edhe bashkinë e Librazhdit dhe Prrenjasit.

Në Korçë e rrethina po ashtu u regjistruar reshje të dendura breshëri dhe stuhi e shoqëruar me erë të fortë e cila zgjati vetëm pak minuta.

Pas përfundimit të stuhisë, pritet të bëhet një vlerësim për dëme të mundshme materiale apo pasoja në kulturat bujqësore të zonës.