Një ngjarje e rëndë ka tronditur kryeqytetin këtë të enjte, ku analisti dhe publicisti i njohur Ilir Demalia është sulmuar dhe dhunuar fizikisht në afërsi të banesës së tij.
Ngjarja ka ndodhur sapo Demalia ka dalë nga shtëpia, kur është përballur me dy persona, banorë të së njëjtës lagje, të cilët kanë nisur ta godasin egërsisht. Si pasojë e sulmit, analisti ka pësuar dëmtime të rënda në zonën e fytyrës, veçanërisht pranë syrit, duke shfaqur plagë të dukshme dhe gjakderdhje. Imazhet e siguruara tregojnë qartë shkallën e dhunës së ushtruar ndaj tij.
Menjëherë pas ngjarjes, Demalia është transportuar për të marrë ndihmë mjekësore.
Në një prononcim të parë pas ngjarjes për emisionin “Shqipëria Live”, Ilir Demalia ka rrëfyer dinamikën e sulmit dhe motivin tronditës pas tij. Ai shpjegoi se agresorët e kanë sulmuar me dyshimin e rremë se ai kishte njoftuar policinë për t’i gjobitur për parkim të gabuar.
“Po dilja nga shtëpia dhe dy persona më sulmuan. Më zunë rrugën dhe më goditën. Janë persona të lagjes. Ishte një polic që po u vendoste gjobë. Ata sa më panë thanë që ‘ti e ke lajmëruar policinë’ dhe më goditën,” u shpreh Demalia.
Analisti theksoi se, ndonëse e kishte ngritur si problem çështjen e parkimeve abuzive në lagje më parë, nuk kishte bërë denoncim në atë moment specifik. Megjithatë, ai u shpreh i tronditur nga urrejtja dhe arroganca e shfaqur, duke i cilësuar agresorët si “cuba”.
“Unë u thashë që nuk e kam lajmëruar më parë por më parë e kam bërë problem. Unë nuk i kam bërë keq askujt. Por urrejtje kam patur plot. Siç është urrejtja e shqiptarëve. Por nuk e kuptojnë që me këtë nuk arrijnë asgjë. Ndërgjegjia ime është e pastër. Këta janë cuba, në sy të policit bënë një dhunë të tillë. Parkojnë ku duan dhe nuk hyjnë dot njerëzit në shtëpitë e tyre,” deklaroi ai.
Pavarësisht frikës dhe dhunës, Ilir Demalia ka konfirmuar se do të bëjë denoncim zyrtar në polici. Ai shprehu besimin se nëse shteti funksionon, autorët do të kapen, duke shtuar se policia është në dijeni të identitetit të tyre.
“Sigurisht që do bëj denoncim. Nëse ka shtet sigurisht do kapen. Policia i di kush janë, nuk e di nëse janë kapur,” përfundoi ai.
Autoritetet policore nuk kanë dalë ende me një njoftim zyrtar lidhur me ngjarjen, ndërsa mbetet e paqartë nëse agresorët janë shoqëruar. Dhunimi i një analisti dhe figure publike në dritë të diellit dhe në sy të një oficeri policie nxit pikëpyetje serioze mbi sigurinë publike dhe respektin ndaj ligjit në kryeqytet.
AV